Претседателот Пендаровски се сретна со претставници на Унијата на здруженија на медицински сестри – ЗМСТАС

Претседателот Стево Пендаровски денеска прими претставници на Унијата на здруженија на медицински сестри – ЗМСТАС.

На средбата, која се реализира по повод одбележување на Меѓународната недела на сестринството, а во пресрет на 12 мај, Меѓународниот ден на медицинските сестри, претставниците на Унијата го запознаа Пендаровски за предвидените активности за одбележување на овие датуми, и со програмата и поставените цели, соопшти Кабинетот на претседателот.

Претставниците на ЗМСТАС информираа и за нивните заложби во здравствената нега и заштита, предизвиците и проблемите со кои се соочуваат, како и за унапредување на положбата на медицинските сестри во државата. Тие истакнаа дека се неопходни инвестирања во сестринството, за кои сметаат дека се одржлива инвестиција која ќе придонесе кон унапредување на здравствената заштита на граѓаните, а полза ќе има и целото општество.

Претседателот Пендаровски упати честитки до претставниците на Унијата на Здруженија на медицински сестри по повод одбележувањето на Неделата на сестринството и по повод 12 мај – Меѓународниот ден на медицинските сестри и ја изрази неговата поддршка во нивното функционирање. Претседателот оддаде признание и се заблагодари за севкупниот ангажман на медицинските сестри и изрази очекување за поизразена и посилна поддршка од институциите во иднина.

На средбата присуствуваа Горданка Бешлиовска, претседателка на ЗМСТАС – ЗА НАС и на Унијата на здруженија на медицински сестри, Ленче Донева, потпретседателка на ЗМСТАС – ЗА НАС и Наџие Фетаи, претседателка на ЗМСТЛА, Тетово, стои во соопштението.

Be the first to comment

Leave a Reply

Your email address will not be published.


*